Vrywilligers speel ‘n onmisbare rol in die sukses van organisasies sonder ‘n winsoogmerk reg oor die wêreld. Dié soort organisasies word ook niewinsgerigte organisasies (NPO’s) genoem. Vrywilligers is van onskatbare waarde vir NPO’s en het ‘n positiewe impak op die gemeenskappe wat hulle dien.
Een van die grootste voordele van vrywilligers is dat hulle ‘n bron van gratis arbeid en hulpbronne is. NPO’s het dikwels beperkte finansiële middele en kan nie altyd die nodige personeel bekostig nie. Vrywilligers vul hierdie gaping deur hul tyd, kundigheid en energie te skenk. Hulle help met verskeie take, soos administratiewe werk, fondsinsameling, veldwerk en bewusmakingsprojekte. Hierdie bydrae stel NPO’s in staat om hul missie voort te sit en om daadwerklik ‘n verskil in gemeenskappe te maak.
Mense wat as vrywilligers betrokke raak, kom dikwels uit verskillende agtergronde en elkeen het unieke kundigheid en ervaring om by te dra. Hierdie diversiteit kan ‘n groot voordeel wees, aangesien dit ‘n organisasie in staat stel om verskillende probleme vanuit verskillende oogpunte te benader. Vrywilligers kom ook met nuwe en kreatiewe idees en oplossings vorendag wat die organisasie in staat stel om innoverend te wees en om ‘n effektiewe diens aan die gemeenskap en begunstigdes te bied.
Vrywilligers vorm ‘n emosionele verbintenis met gemeenskappe wat van groot waarde vir ‘n NPO is. Hulle raak betrokke en gee hulle tyd en kundigheid gewoonlik daar waar hulle ‘n passie vir ‘n saak het en hulle passie en toewyding het ‘n groot impak om die gemeenskap en die persone wat baat by die diens wat hulle lewer. Vrywilligers voer nie net praktiese take uit nie, maar gee ook emosionele ondersteuning en skep ‘n gevoel van omgee in die gemeenskap. Hierdie verbintenis en omgee dra by tot ‘n positiewe omgewing waar mense kan groei, floreer en optimaal funksioneer.
Met hulle betrokkenheid inspireer vrywilligers ook ander om betrokke te raak en ‘n verskil te maak. Sodoende skep hulle bewusmaking van die organisasie se werksaamhede en stel die organisasie in staat om ‘n al hoe duideliker voetspoor in die gemeenskap te laat. Vrywilligers is die hande en voete van ‘n NPO en dien as ambassadeurs en rolmodelle vir die saak waarvoor hulle hul beywer. Hulle help ook om hulle gemeenskap bewus te maak van die gemeenskap se uitdagings en behoeftes. Saam lei die vrywilligers se bewusmaking en passie tot groter ondersteuning en beter samewerking van die gemeenskap en individue.
Indien jy reeds ‘n vrywilliger is: Dankie dat jy bereid is om jou tyd, kundigheid en energie te gee om ‘n verskil te maak. Indien jy as vrywilliger betrokke wil raak by ‘n organisasie wat gemeenskappe ontwikkel om vry, veilig en voorspoedig te leef: Gee vandag nog jou hand en stuur gerus vir my ‘n e-pos na chantell@helpendehand.co.za.
Besoek gerus www.vrystaathand.co.za vir meer inligting oor ons werksaamhede in die Vrystaat en Bo-Karoo.
